Bugun Rossiyaning Serpuxov shahrida "IBA Chempionlar oqshomi" turniri bo‘lib o‘tadi.

Oqshomning markaziy jangi og‘ir vaznda rossiyalik Muslim Gajimagomedov va Xitoy vakili Zaoxin Chjang o‘rtasida WBA chempionlik kamari uchun kechadi.

Biz uchun ahamiyatlisi, turnirning asosiy kardida Shahobiddin Zoirov ringga ko‘tariladi. Hamyurtimizga rossiyalik Dmitriy Dvali raqib bo‘ladi. Jang 53,5 kg vazn toifasida 8 raund etib belgilangan bo‘lib, asosiy kardni ochib beradi. Ushbu jang natijasi bokschilarning professional rekordiga kiritiladi.

"IBA Coliseum" majmuasida o‘tadigan turnir Toshkent vaqti bilan soat 21:00 da boshlanadi.

Ma’lumot uchun, Shahobiddin Zoirov shu kungacha prof boksda 5 ta jang o‘tkazib, barchasida g‘alaba qozongan. U prof ringdagi so‘nggi jangini 2022 yil 13 avgust kuni Toshkentda Gerson Lariosga qarshi o‘tkazib, birinchi raunddayoq g‘alaba qozongan edi.