Yaqinda Tyago Alkantara futbolchilik faoliyatini yakunlaganini e’lon qildi. "Barselona"ning sobiq futbolchisi butsalarini ancha erta - 33 yoshida mixga ildi. Bu qarorga jarohatlar sabab bo‘ldi - so‘nggi yillarda Tyago "Liverpul"da kam o‘ynadi.
Endi Tyago "Barselona"da Xans-Diter Flikning murabbiylar shtabida tajriba orttiradi. Kataloniya klubi Tyago yaqin haftalarda, jumladan, AQSHda bo‘lib o‘tadigan turne davomida ishlashini ma’lum qildi. Keyinchalik nima bo‘lishi hozircha noma’lum. Tyago futbolchi sifatida “Barselona” safida 100 ta o‘yin o‘tkazib, 11 ta gol urgan va jamoadoshlariga 20 ta golli uzatma bergan.
