Huquqbuzarga Ma’muriy javobgarlik to‘g‘risidagi kodeksning tegishli moddasi bilan jazo tayinlandi.
Joriy yilning 17 iyul kuni Jinoyat ishlari bo‘yicha Toshkent shahar Uchtepa tuman sudida Ma’muriy javobgarlik to‘g‘risidagi kodeksning 177-1-moddasi 1-qismi bilan sudlangan 2002-yilda tug‘ilgan J.A ning ishi ko‘rildi.
J.A. “Evro-2024” futbol o‘yinlarini o‘zining “ASL FUTBOL LIVE” Telegram-kanalida ushbu o‘yinlarni to‘g‘ridan-to‘g‘ri translyasiya qilish huquqiga ega bo‘lgan “TELERADIOKOMPANIYA ZO’R” MCHJdan tegishli ruxsat olmasdan turib efirga uzatgan.
Sud majlisida huquqbuzar J.A. o‘zining Telegramdagi “ASL FUTBOL LIVE” kanalida “Evro-2024” futbol o‘yinlarini tegishli ruxsatsiz translyasiya qilganini tan olib, qilmishidan afsusda ekanligini, bunday xatti-harakati takrorlanmasligini, ishsiz va og‘ir sharoitda ekanini tilga olib, yengil sud jazosini so‘ragan.
Sud hukmiga ko‘ra, J.A. ma’muriy javobgarlik to‘g‘risidagi kodeksning 177-1-moddasi 1-qismida nazarda tutilgan ma’muriy huquqbuzarlikni sodir etganlikda aybdor deb topildi. J.A. 340 000 so‘m (BHMning bir baravariga teng) miqdorda jarimaga tortildi.
