"Navbahor" klubi va futbolchi o‘rtasidagi o‘zaro kelishuvga ko‘ra, 33 yoshli tajribali darvozabon O‘tkir Yusupov jamoamiz bilan do‘stona xayrlashdi hamda faoliyatini Eronning "Fulad" jamoasida davom ettirishga qaror qildi.

Yusupov “Navbahor” tarkibiga 2019 yili qo‘shilgandi.

“Lochinlar” tarkibidagi 5,5 yillik faoliyati davomida tajribali posbon O‘zbekiston Superligasi bahslarida 113 ta, O‘zbekiston kubogi uchrashuvlarida 23 ta, Osiyo Chempionlar ligasi (OCHL) bellashuvlarida 9 ta, jamoamiz tarkibidagi barcha musobaqalarda jami 145 ta bellashuvda maydonga tushdi.

E’tiborlisi, mazkur o‘yinlarning 76 tasida O‘tkir Yusupov o‘z darvozasini “quruq” saqlagan.

Yusupov “Navbahor”ning so‘nggi muvaffaqiyatlariga o‘zining munosib hissasini qo‘shib, “lochinlar” tarkibida kumush (2022 yil) va bronza (2023 yil) medallarini qo‘lga kiritib, 2022 yilgi O‘zbekiston kubogi bahslarida finalga qadar yetib bordi.

"O‘tkir Yusupovga “Navbahor”dagi faoliyati uchun klubimiz hamda muxlislar nomidan minnatdorchilik bildirib, yangi jamoasida omad yor bo‘lishini tilaymiz" - deyiladi namanganliklarning bayonotida.