"Навбаҳор" клуби ва футболчи ўртасидаги ўзаро келишувга кўра, 33 ёшли тажрибали дарвозабон Ўткир Юсупов жамоамиз билан дўстона хайрлашди ҳамда фаолиятини Эроннинг "Фулад" жамоасида давом эттиришга қарор қилди.

Юсупов “Навбаҳор” таркибига 2019 йили қўшилганди.

“Лочинлар” таркибидаги 5,5 йиллик фаолияти давомида тажрибали посбон Ўзбекистон Суперлигаси баҳсларида 113 та, Ўзбекистон кубоги учрашувларида 23 та, Осиё Чемпионлар лигаси (ОЧЛ) беллашувларида 9 та, жамоамиз таркибидаги барча мусобақаларда жами 145 та беллашувда майдонга тушди.

Эътиборлиси, мазкур ўйинларнинг 76 тасида Ўткир Юсупов ўз дарвозасини “қуруқ” сақлаган.

Юсупов “Навбаҳор”нинг сўнгги муваффақиятларига ўзининг муносиб ҳиссасини қўшиб, “лочинлар” таркибида кумуш (2022 йил) ва бронза (2023 йил) медалларини қўлга киритиб, 2022 йилги Ўзбекистон кубоги баҳсларида финалга қадар етиб борди.

"Ўткир Юсуповга “Навбаҳор”даги фаолияти учун клубимиз ҳамда мухлислар номидан миннатдорчилик билдириб, янги жамоасида омад ёр бўлишини тилаймиз" - дейилади наманганликларнинг баёнотида.