"Liverpul"ning sobiq himoyachisi Stiven Kolker "Kechiorengyudjyu"ga o‘tdi.

32 yoshli futbolchi may oyida LinkedIn ijtimoiy tarmog‘ida ish izlash haqida xabar qoldirgan edi. Endi Kolker Turkiyaga qaytib, 2-divizion vakili bilan shartnoma imzolaganini ma’lum qildi.

"Agar dastlab muvaffaqiyatga erisha olmasangiz, yana urinib ko‘ring. Oldinda 16-mavsum. Oradan bir yil o‘tib klub topish oson bo‘lmadi, lekin nihoyat menga shunday imkoniyat berilganidan xursandman.

So‘nggi bir necha oy ichida men ko‘plab xabarlar yubordim, ularning aksariyati javobsiz qoldi. Menga ham shartnomalar va’da qilishdi, keyin esa noaniq qolib ketishdi.

Bu o‘z-o‘ziga achinish posti emas. Bu futbolning haqiqati. Agar siz ushbu sohada martaba olishni istasangiz, u bilan birga keladigan barcha yoqimsiz narsalarni engishga tayyor bo‘lishingiz kerak", dedi Stiven Kolker.

Kolker Angliya terma jamoasiga ham chaqirilgan va London-2012 Olimpiya o‘yinlarida Buyuk Britaniya olimpiya terma jamoasi sharafini himoya qilgan.

Shundan so‘ng himoyachi fuqaroligini o‘zgartirib, Serra-Leone terma jamoasi sardori bo‘ldi. Afrika terma jamoasi safida 13 ta o‘yin o‘tkazgan.