Superligada 15-tur bahslari start oldi. «Lokomotiv» jamoa bu tur «Olimpik» bilan kuch sinashdi va 1:1 hisobida durang o‘ynadi.

Uchrashuvdan so‘ng "temiryo‘lchilar" bosh murabbiyi Aleksandr Krestinin matbuot anjumanida ishtirok etdi.

— Oson bo‘lmagan o‘yin o‘tkazdik. Natijadan qoniqmadik. Bugun o‘z imkoniyatlarimizni hech bo‘lmaganda uchdan bir qismidan foydalanganimizda ham vaziyat boshqacha bo‘lar edi. Afsuski, bitta gol g‘alaba uchun kamlik qiladi.  

— Jamoaning ikkinchi davraga tayyorgarlik jarayoni qanday kechdi?
— Tayyorgarlik a’lo darajada o‘tdi. Qilinishi kerak bo‘lgan ishlar bajarildi. Nazorat uchrashuvlarini o‘tkazdik. Transfer kampaniyasi ham imkoniyatlarimizdan kelib chiqqan holda amalga oshirildi. Biroz vaqt kerak. Hammasi o‘z o‘rniga tushadi.

—  Shogirdlaringiz gol kiritgandan so‘ng, to‘pni pastda ushlagan holda harakat qilishni boshladi. Bu siz tomondan berilgan ko‘rsatma edimi?

— Biz birinchi bo‘lim uchun bunday reja qilmagan edik, ammo ikkinchi taym uchun rejalarimizda bu omil bor edi.

— Ha, albatta natija boshqacharoq ko‘rinmoqda, biroq Jamoangizni o‘yini turdan-turga yaxshilanib bormoqda deb o‘ylaysizmi?

— Albatta, g‘alaba qozonish doim yoqimli, ammo biz 3 o‘yindan beri mag‘lub bo‘lmayapmiz. Afsuski, vaziyatlardan foydalana olmaganimiz pand bermoqda. Shunga qaramay, vaziyatlar yaratilayotganidan xursandman.