Суперлигада 15-тур баҳслари старт олди. «Локомотив» жамоа бу тур «Олимпик» билан куч синашди ва 1:1 ҳисобида дуранг ўйнади.

Учрашувдан сўнг "темирйўлчилар" бош мураббийи Александр Крестинин матбуот анжуманида иштирок этди.

— Осон бўлмаган ўйин ўтказдик. Натижадан қониқмадик. Бугун ўз имкониятларимизни ҳеч бўлмаганда учдан бир қисмидан фойдаланганимизда ҳам вазият бошқача бўлар эди. Афсуски, битта гол ғалаба учун камлик қилади.  

— Жамоанинг иккинчи даврага тайёргарлик жараёни қандай кечди?
— Тайёргарлик аъло даражада ўтди. Қилиниши керак бўлган ишлар бажарилди. Назорат учрашувларини ўтказдик. Трансфер кампанияси ҳам имкониятларимиздан келиб чиққан ҳолда амалга оширилди. Бироз вақт керак. Ҳаммаси ўз ўрнига тушади.

—  Шогирдларингиз гол киритгандан сўнг, тўпни пастда ушлаган ҳолда ҳаракат қилишни бошлади. Бу сиз томондан берилган кўрсатма эдими?

— Биз биринчи бўлим учун бундай режа қилмаган эдик, аммо иккинчи тайм учун режаларимизда бу омил бор эди.

— Ҳа, албатта натижа бошқачароқ кўринмоқда, бироқ Жамоангизни ўйини турдан-турга яхшиланиб бормоқда деб ўйлайсизми?

— Албатта, ғалаба қозониш доим ёқимли, аммо биз 3 ўйиндан бери мағлуб бўлмаяпмиз. Афсуски, вазиятлардан фойдалана олмаганимиз панд бермоқда. Шунга қарамай, вазиятлар яратилаётганидан хурсандман.