81 kilogramm vazn toifasida Parijdagi Olimpiya o‘yinlari chempioni bo‘lgan norvegiyalik og‘ir atletikachi Solfrid Koanda o‘z mamlakatidagi og‘ir atletikachilarning kam daromadi haqida gapirdi.
"Hozir o‘zimni ma’buda kabi his qilyapman, lekin balki yana elektrchi bo‘lib ishlayman, bilmayman. Balki 2028-yilgi Olimpiadaga tayyorgarlikni moliyalashtirish uchun oltin medalni sotuvga qo‘yishga majbur bo‘larman, ko‘ramiz", — deya sportchining so‘zlarini keltiradi NRK.
25 yoshli Koanda dast ko‘tarish va siltab ko‘tarishda jami 275 kg natija qayd etib, Olimpiya rekordi bilan Parijdagi musobaqada g‘olib chiqdi.
Ikkinchi o‘rinni misrlik sportchi Sara Ahmad (268 kg) egalladi. Kuchli uchlikka Ekvador vakili Neysi Dahomes (267 kg) yakun yasadi.
