Angliya Premyer-ligasi “Manchester Siti”ni 2009-2018 yillar davomida 115 ta moliyaviy qoidalarni buzganlikda ayblamoqda. Jurnalist Martin Ziglerning so‘zlariga ko‘ra, bu ish bo‘yicha tinglovlar sentyabr oyining o‘rtalaridan oxirigacha boshlanishi rejalashtirilgan. Mustaqil komissiya o‘n hafta ichida yakuniy hukm chiqarishi kutilmoqda. Shunday qilib, agar hamma narsa reja bo‘yicha ketsa, "shaharliklar" taqdiri keyingi yil boshida hal qilinadi.
"Manchester Siti" Angliya chempionatining so‘nggi to‘rtta mavsumida g‘alaba qozondi. 18 avgust kuni Pep Gvardiola shogirdlari navbatdagi chempionlik himoyasini Londonning “Chelsi” klubiga qarshi safarda boshlaydi. Uchrashuv Toshkent vaqti bilan 20:30da boshlanadi.
