"Manchester Yunayted" sardori Brunu Fernandesh yangi shartnoma bo‘yicha muzokaralar chog‘ida klub rahbariyatiga qo‘ygan talablarini oshkor qildi.
O‘tgan haftada portugaliyalik yarim himoyachi "qizil iblislar" bilan 2027 yilgacha shartnoma tuzdi. 29 yoshli futbolchi shartnoma uzaytirilgani e’lon qilinganidan keyin bergan intervyusida faoliyatini davom ettirish uchun boshqa variantlarni ham ko‘rib chiqqanini, ammo "Manchester Yunayted"ning yangi loyihasidan hayratda qolganini tan oldi.
"Ochig‘i, men chempionatda g‘alaba va’da qilishlarini talab qilmaganman", - deya tushuntiradi "qizil iblislar" yetakchisi. - Bunga hech kim kafolat bera olmaydi. Lekin bizda mavsum davomida raqobatlasha oladigan, sovrinlar uchun kurashadigan va yuqori saviyada o‘ynay oladigan jamoa bo‘lishi kerak.
O‘ylaymanki, klub raqobatbardoshlikni ta’minlash uchun imkon qadar ko‘proq yaxshi o‘yinchilarni jalb qilishga harakat qilmoqda. Ko‘ryapmanki, kerakli harakatlar qilinmoqda”, - dedi Fernandesh MUTV telekanaliga.
