"Манчестер Юнайтед" сардори Бруну Фернандеш янги шартнома бўйича музокаралар чоғида клуб раҳбариятига қўйган талабларини ошкор қилди.

Ўтган ҳафтада португалиялик ярим ҳимоячи "қизил иблислар" билан 2027 йилгача шартнома тузди. 29 ёшли футболчи шартнома узайтирилгани эълон қилинганидан кейин берган интервьюсида фаолиятини давом эттириш учун бошқа вариантларни ҳам кўриб чиққанини, аммо "Манчестер Юнайтед"нинг янги лойиҳасидан ҳайратда қолганини тан олди.

"Очиғи, мен чемпионатда ғалаба ваъда қилишларини талаб қилмаганман", - дея тушунтиради "қизил иблислар" етакчиси. - Бунга ҳеч ким кафолат бера олмайди. Лекин бизда мавсум давомида рақобатлаша оладиган, совринлар учун курашадиган ва юқори савияда ўйнай оладиган жамоа бўлиши керак.

Ўйлайманки, клуб рақобатбардошликни таъминлаш учун имкон қадар кўпроқ яхши ўйинчиларни жалб қилишга ҳаракат қилмоқда. Кўряпманки, керакли ҳаракатлар қилинмоқда”, - деди Фернандеш MUTV телеканалига.