AQSHning Sent-Luis shahrida davom etayotgan «Sinquefield Cup-2024» turnirining ortda qolgan 6-tur o‘yinlaridan keyin fransiyalik Alireza Firuzja 4 ochko bilan yetakchilikni mustahkamlab olgan bo‘lsa, Nodirbek Abdusattorov 2,5 ochko bilan 8-o‘ringa ko‘tarilishga muvaffaq bo‘ldi.
Kecha kechki payti «Grand Chess Tour» musobaqasining beshinchi bosqichi hisoblangan mazkur turnirning 6-turida Nodirbek Abdusattorov qora donalarda niderlandiyalik Anish Giriga qarshi dona surdi. Teng kurashlar ostida o‘tgan uchrashuvning 56-yurish holatida tomonlar durangga imzo chekdi.
Yan Nepomnyashiy – Fabiano Karuana 0:1;
Din Lijen – Rameshbabu Pragnanandxa 0,5:0,5;
Uesli So – Alireza Firuzja 0,5:0,5;
Dommaradju Gukesh – Maksim Vashye Lagrav 0,5:0,5 hisoblari qayd etildi.
Bugun, 26 avgust kuni nufuzli musobaqaning 7-turida hamyurtimiz Nodirbek Abdusattorov oq donalarda amerikalik Uesli Soga qarshi harakatlansa, qolgan doskalarda Maksim Vashye Lagrav – Anish Giri, Rameshbabu Pragnanandxa – Yan Nepomnyashiy, Alireza Firuzja –Din Lijen, Fabiano Karuana – Dommaradju Gukesh o‘yinlari bo‘lib o‘tadi.
«Sinquefield Cup-2024» turnirining so‘nggi tur o‘yinlari 29 avgust kuni tashkil etiladi.
