Hujumkor yarim himoyachi Arda Gyuler Yevropaning eng iqtidorli yosh futbolchilaridan biri sifatida «Real Madrid»ga qo‘shildi. Biroq o‘tgan mavsumda La Ligada Gyuler «Los-Blankos» libosida bor-yo‘g‘i 10 ta o‘yinda maydonga tushdi. Biroq 19 yoshli turkiyalik taslim bo‘lmadi va mashg‘ulotlarda astoydil harakat qildi. Insayder Matteo Morettoning so‘zlariga ko‘ra, aynan shu narsa aprel oyida «Real» bosh murabbiyi Karlo Anchelottini Gyuler Madridda qolishi va ijaraga berilmasligi haqida qaror qabul qilishga ko‘ndirgan.
«Anchelotti dastlab Gyulerning iqtidori va qobiliyatiga ishonmagan. Ammo uning mashg‘ulotlar davomida ko‘rsatgan taraqqiyoti va rivojlanishi ko‘pchilikni, jumladan, Anchelottini ham hayratda qoldirdi», deb yozadi Moretto.
