Lissabonning "Sporting" klubi bosh murabbiyi Ruben Amorim Chempionlar ligasi umumiy bosqichi 1-tur uchrashuvida Fransiyaning "Lill" jamoasini mag‘lub etganidan so‘ng (2:0) jamoada biroz xavotir bo‘lganini, biroq birinchi gol taranglikni bartaraf etib, kerakli natijani keltirganini aytdi.
"Maqsad har doimgidek. Bu yangi mavsumda o‘z maydonimizdagi birinchi o‘yin edi. Boshida asabiylashdik, keyin esa hammasi yaxshi o‘tdi", - dedi mutaxassis UYEFA rasmiy saytiga.
Eslatib o‘tamiz, birinchi bo‘limning 5 daqiqasida portugaliyaliklar dastlab Dyekereshning sa’y-harakatlari bilan hisobni ochishgandi, shundan so‘ng (40-daqiqada) mehmonlar tarkibida Anxel Gomes maydondan chetlatildi.
