Vengriyada davom etayotgan Butunjahon shaxmat olimpiadasida bugun 10-tur bahslari bo‘lib o‘tadi.

O‘zbekiston erkaklar terma jamoasi Hindiston bilan durang o‘ynagach, jadvalda 3-o‘ringa tushdi. Vengriyani mag‘lub etgan AQSH terma jamoasi o‘z ochkolarini 15 taga yetkazdi hamda qo‘shimcha ko‘rsatkich bo‘yicha bizdan oldinga o‘tib oldi.

Yigitlarimiz bugun Xitoyga qarshi dona suradi. Birinchi raqamli shaxmatchimiz Nodirbek Abdusattorov oq donalarda harakat qiladi.

Xitoy hisobida ham 15 ochko bor va bu jamoa 9-turdan so‘ng 4-pog‘onani egallab turibdi.

Shuningdek, bugun Hindiston va AQSH terma jamoalari o‘zaro bahs olib borishadi.

O‘zbekiston ayollar terma jamoasi esa Angliyaga qarshi dona suradi. Bu jamoa jadvalda 16-pog‘onani band etib turibdi.