Pro-liganing 21-turidan o‘rin olgan “Do‘stlik” - “Mash’al” (1:2) uchrashuvidan so‘ng mehmonlar bosh murabbiyi Asror Aliqulov o‘z fikrlarini bildirib o‘tdi.

“Bugungi o‘yinda ko‘p narsa o‘zimizga bog‘liq edi. Tayyorgarlik jarayonida “Do‘stlik” jamoasiga qarshi hushyorroq turish lozimligini uqtirgandik. Jadvaldagi o‘rniga qarab emas, bugun namoyish etayotgan o‘yiniga qarab harakat qilish kerakligini aytib o‘tgandik. Qarshi hujumlarni ushlash va raqibni jazolash rejamiz bor edi. Bugun xatolarga ham yo‘l qo‘ydik, hisobda oldinga chiqib olgan bo‘lsak ham keyinchalik gol o‘tkazib yubordik. So‘ngi daqiqalarda mehnatlarimiz samarasi evaziga gol urib, g‘alabani ilib ketdik. O‘yindan qoniqish hosil qilmadik, futbolchilarning yo‘l qo‘ygan xatolarini uchrashuv videosini ko‘rib chiqib, tahlil qilamiz” - deydi muborakliklar ustozi.