Kecha Londonda shaxmat bo‘yicha «WR Chess Masters» musobaqasiga start berildi. Unda ikki hamyurtimiz — Nodirbek Abdusattorov va Javohir Sindarov ishtirok etishi haqida xabar berib o‘tgandik.

16 nafar sportchi ishtirok etadigan turnir nokaut tizimida o‘tkazilmoqda. Kecha nimchorak final bosqichi o‘yinlari o‘tkazildi.

Turnir formati: Birinchi 30 ta yurish uchun 60 daqiqa, keyingi 20 ta yurishga 30 daqiqa va o‘yin oxirigacha yana 30 daqiqa. Shaxmatchilar raqiblari bilan ham oqlardan, ham qoralardan 1 tadan partiya o‘ynashadi, mag‘lub bo‘lgan ishtirokchi turnirni tark etadi.

Abdusattorov ilk bosqichda shveysariyalik Aleksandra Kostinyukka qarshi bahs olib bordi. Ilk partiyada hamyurtimiz oq donalarda o‘ynadi va g‘alabaga juda yaqin edi. Ammo Abdusattorov 32 va 33-yurishlarda qo‘pol xatoga yo‘l qo‘ydi: u G piyodani ikki katak surib, Shohning mudofaasini ochib qo‘ydi. Natijada raqib qarshi hujumga o‘tib ketdi va g‘alaba qozondi.

Nodirbek ikkinchi partiyada qora donalarda o‘ynab, g‘alabaga erishdi. Aleksandr 32-yurishda mag‘lubiyatini tan oldi.

Hisob tenglashgach, g‘olib nomi Armagedon partiyada aniqlandi. Unda oqlarga 10 daqiqa, qoralarga 8 daqiqa beriladi hamda oqlardan g‘alaba talab etiladi. Durang esa qoralar uchun g‘alaba taqdim etiladi. Qur’a ko‘ra, Abdusattorov Armagedonda qora donalarda o‘ynadi. Vatandoshimiz uchinchi partiyada ham g‘alabaga yaqin edi. Ammo Kostinyuk 44-46-yurishlarda ketma-ket shoh berib, bir yurishni 3 marta takrorladi. Bu esa durang degani. Durang qoralar uchun g‘alabaga teng.

Javohir Sindarov va fransiyalik Maksim Vashe-Lagrav o‘rtasidagi asosiy partiyalarda durang qayd etildi. Sindarov Armagedonda oq donalarda o‘ynadi. Javohir o‘yin davomida ustunlikka erishdi. Ammo 30, 31 va 32-yurishlarda noaniqlik tufayli vaziyat tenglashib qoldi. Natijada fransiyalik raqib durangni ushlab qoldi.

Shu tariqa, Maksim Vashe-Lagrav bugun chorak final doirasida Nodirbek Abdusattorov bilan to‘qnash keladi.