"Tottenxem" va Braziliya terma jamoasi hujumchisi Risharlison 2024 yilgi "Oltin to‘p" sovrini natijalariga munosabat bildirdi. Sovrinni “Manchester Siti” va Ispaniya terma jamoasi yarim himoyachisi Rodri oldi.
"Futbol bilan yashayotgan barchamiz har mavsum individual sovrinlarni intiqlik bilan kutamiz. Bugun futbolga mehr qo‘ygan barcha braziliyaliklar oradan shuncha vaqt o‘tib yurtimizdan yana bir futbolchi “Yilning eng yaxshi futbolchisi” sovrinini olishini kutish bilan uyg‘ondi.
Afsuski, barchaga tushunarsiz mezonlar tufayli mukofot kelmadi. Meni noto‘g‘ri tushunmang, Rodri - eng yaxshilar qatoriga kirishga loyiq ajoyib futbolchi. Lekin Vini "Oltin to‘p"ni olmagani uyat, futbol bugun mag‘lub bo‘ldi.
Vini uning orzusi butun Braziliya uni olqishlayotganini ko‘rish ekanligini aytganini eslayman. Va bugun o‘sha kun keldi! Siz gigantsiz va dunyodagi eng zo‘risiz! Va hech qanday sovrinlar buni o‘zgartirmaydi. Oldinga intiling va hech qachon indamang! Men siz bilan!" - deb yozdi Risharlison o‘zining ijtimoiy tarmoqdagi sahifasida.
