"Manchester Yunayted" vaqtinchalik bosh murabbiyi Rud van Nistelroy jamoaning yangi bosh murabbiyi Ruben Amorim bilan yaqindan tanishishni intiqlik bilan kutayotganini aytdi. Portugaliyalik mutaxassis klub safiga 11 noyabr kuni kelib qo‘shiladi.
"Men u bilan yaqinroq tanishishni intiqlik bilan kutyapman. U o‘zini yosh, iste’dodli murabbiy sifatida ko‘rsatdi, u uzoq vaqt davomida Portugaliyada muvaffaqiyat qozondi. Shunday ekan, aytganimdek, klubning oldinga siljishiga yordam berishda davom etishni intiqlik bilan kutaman – bu mening asosiy maqsadim.
Men u bilan gaplashmadim va hozircha bunday qilish niyatim ham yo‘q. Men payshanba va yakshanba kungi o‘yinlarga tayyorgarlik ko‘rish uchun o‘z ishimni qilyapman va shu orada yangi bosh murabbiy bilan muloqotda vaziyat qanday rivojlanishini kutyapman", - dedi van Nistelroy.
Niderlandiyalik murabbiy APLning 10-turi doirasidagi “Chelsi” bilan uyindagi durangdan ham xafsalasi pir bo‘lganini aytdi.
"Biz ikkinchi golni ura olmadik va mavjud imkoniyatlardan foydalana olmaganimiz uchun biroz hafsalamiz pir bo‘ldi. Bu tuyg‘u nafaqat shaxsan menda, balki kiyinish xonasida ham paydo bo‘lgan.
Oxirgi o‘yinlarda imkoniyatlarimizni o‘zgartira olmaganimiz uchun bir necha ochko yo‘qotdik. Mavsum davomida ko‘p narsa yaratganimiz yaxshi.
Shu ma’noda, men unchalik tashvishlanmayman. Qachonki, futbolchilar o‘yinga kirishib, natijaga erisha boshlasa va o‘ziga ishonch paydo bo‘lsa, o‘shanda maqsadlar keladi", - dedi van Nistelroy.
