Superligada 24-tur o‘yinlari davom ettirildi. «Surxon» jamoasi bu tur o‘z maydonida «Neftchi»ni qabul qildi va 0:0 hisobida durang o‘ynadi. Bellashuvdan so‘ng jamoa bosh murabbiyi Fevzi Davletov matbuot anjumanida ishtirok etdi.

— Bugun muhim bahs edi. Turnir jadvalida yuqoriga ko‘tarilib, liderlar qatoriga qo‘shilish imkoniyatini nazarga tutganda durang natija og‘ir o‘yin bo‘ldi. Adolatli natija. Vaziyatlar bo‘ldi, foydalanish kerak edi. Bunday imkoniyatlar doim ham bo‘lavermaydi. Raqib ham yaxshi himoyalandi. Shu sababli bu uchrashuv qiyin o‘tdi.

— «Surxon» barqarorlik ko‘rsatmoqda – o‘tgan mavsum jamoa 6-o‘rinni egallagandi. Klub rahbarlari jamoa faoliyatiga qanchalik qiziqish bildirmoqda? Natija ularni qanchalik qoniqtirmoqda?

— Rahbariyat har doim biz bilan doimiy aloqada. Bugun ham gaplashdik. O‘tgan yili 6-o‘rin bo‘lgandi. Bu mavsumda yuqoriroqda bo‘lishga harakat qilamiz. Bizda shu o‘yinda va oldingi uchrashuvda ham xatolar, yo‘qotishlar bo‘ldi. Samarqandda ham ko‘plab xatolarga yo‘l qo‘ydik. Rahbariyat ko‘rsatayotgan o‘yinimizdan xursand. Murabbiy xohlagan o‘yinni yigitlar namoyish etishmoqda. Qaysidir bellashuvlarda hujumlarda biroz bo‘shashdik, hujumchilar bilan bog‘liq muammolar yuzaga keldi. Chetlatishlar bizni qiyin ahvolga solib qo‘ydi. O‘yin tashkil etish bo‘yicha, menimcha, bizda hammasi joyida.

Maydonimizda rekonstruksiya ishlari nihoyasiga yetmaganligi uchun Samarqandda o‘ynamoqdamiz. Keyingi yildan Termizda uy uchrashuvlarimizni o‘tkazamiz. Albatta, doim vaziyatdan xabardor bo‘lib turibmiz.

— Jamoani 7-o‘rindaligi sizni qoniqtiryaptimi?
— Natija bo‘yicha ha. Kubok bahsida biroz omad kelmadi. Finalga chiqish imkoniyatimiz ham bor edi, ammo aytganimdek, biroz omad yetishmadi.

— Superliga yakunlanishiga 2 tur qoldi. Natijalardan qanchalik qoniqyapsiz?
— Bizda tartibsiz o‘yinlar ham bo‘ldi. Shunday uchrashuvlardan xulosa qilib bunday vaziyatdan chiqib keta oldik. Klubning maqsadi va o‘yini bor. Buning uchun yanada ko‘proq ishlash kerak.