«Arsenal» «Sporting» himoyachisi Usmon Diomandeni kuzatishda davom etmoqda. 2023 yilning yanvarida portugal klubiga kelib qo‘shilgan Diomande allaqachon o‘zini Yevropa futbolidagi eng istiqbolli markaziy himoyachilardan biri sifatida ko‘rsatdi, deb xabar beradi "Metro".

Diomande o‘tgan mavsumda 26 ta o‘yinda maydonga tushib, «Sporting»ga 20-marta Portugaliya chempioni bo‘lishiga yordam berdi. Lissabondagi muvaffaqiyati sabab so‘nggi oylarda Yevropaning top-klublaridan biriga o‘tish mumkinligi haqidagi mish-mishlar tez-tez uchramoqda. Xabar qilinishicha, «Arsenal» yozda 30 million yevrolik taklif bilan birinchi harakatni amalga oshirgan, biroq bu taklif klub tomonidan rad etilgan.

Portugaliya matbuoti xabariga ko‘ra, Diomandega «Bavariya» va Londonning «Chelsi» klublari ham qiziqish bildirmoqda. Biroq, «Sporting» o‘z futbolchisi uchun yuqori narx talab qilmoqchi, uning shartnomasida tovon puli 80 million yevro.