«Арсенал» «Спортинг» ҳимоячиси Усмон Диомандени кузатишда давом этмоқда. 2023 йилнинг январида португал клубига келиб қўшилган Диоманде аллақачон ўзини Европа футболидаги энг истиқболли марказий ҳимоячилардан бири сифатида кўрсатди, деб хабар беради "Metro".

Диоманде ўтган мавсумда 26 та ўйинда майдонга тушиб, «Спортинг»га 20-марта Португалия чемпиони бўлишига ёрдам берди. Лиссабондаги муваффақияти сабаб сўнгги ойларда Европанинг топ-клубларидан бирига ўтиш мумкинлиги ҳақидаги миш-мишлар тез-тез учрамоқда. Хабар қилинишича, «Арсенал» ёзда 30 миллион евролик таклиф билан биринчи ҳаракатни амалга оширган, бироқ бу таклиф клуб томонидан рад этилган.

Португалия матбуоти хабарига кўра, Диомандега «Бавария» ва Лондоннинг «Челси» клублари ҳам қизиқиш билдирмоқда. Бироқ, «Спортинг» ўз футболчиси учун юқори нарх талаб қилмоқчи, унинг шартномасида товон пули 80 миллион евро.