O‘FA va Sport vazirligi rahbariyati Milliy futbol markazidagi qurilish ishlari bilan tanishib, kelgusi rejalarni muhokama qildi
Yurtimizdagi futbol infratuzilmasini yaxshilash, xususan, terma jamoalarimiz uchun qulay sharoitlar yaratish maqsadida Toshkent viloyatida Milliy futbol markazining qurilish ishlari qizg‘in davom etmoqda.
Bugun O‘zbekiston futbol assosiasiyasi prezidenti Abdusalom Azizov va Sport vaziri Adham Ikramov boshchiligidagi ishchi guruh jarayon bilan yaqindan tanishish va kelgusi rejalarni muhokama maqsadida qurilish maydonchasida bo‘ldi.
Toshkent viloyatining Yuqori Chirchiq tumanida joylashgan ushbu markaz jahon standartlariga mos futbol infratuzilmasini o‘zida qamrab oladi. Sportimiz rahbariyatiga mazkur bazadan o‘rin olgan ob’ektlar, xususan, maydonlar, futbolchilar yashashi uchun mehmonxona, o‘quv markazi, tibbiy-reabilitasiya binosi, yashil hudud va yana bir qancha loyihalar haqida ma’lumot berildi.
Futbolimiz rahbari tibbiy-reabilitasiya markazini eng so‘ngi texnikalar bilan jihozlash, mashg‘ulotlar o‘tkazish uchun zarur bo‘lgan barcha inventanlar bilan ta’minlash, sport uchun kerakli hisoblangan barcha sharoitlarni tashkil etish bo‘yicha topshiriqlar berdi. Shuningdek, qurilish ishlariga mas’ul bo‘lgan tashkiloti vakillari hamda mutasaddilarga bir qator masalalar yuzasidan takliflar berildi
