O‘tgan mavsumda Eron chempionligini qo‘lga kiritgan “Persepolis” klubi o‘z futbolchilariga tilla iPhone sovg‘a qildi.
O‘zbekiston terma jamoasi hamda Eron klubi a’zosi Oston O‘runov bu haqda o‘zining ijtimoiy tarmoqdagi sahifasida ma’lum qildi. Futbolchi Instagramdagi sahifasiga telefon suratini joylagan va “Mening ‘Persepolis’im” deya yozib qoldirgan.
Ma’lumot uchun, Oston O‘runov 2024 yilning fevral oyidan Eron klubida to‘p sura boshladi. Klub safida 18 o‘yinda ishtirok etgan futbolchi 7 bor raqiblar darvozasiga yo‘l topa olgan.
Oston O‘runov terma jamoaning noyabr oyidagi o‘yinlarini jarohat sabab o‘tkazib yuboradi. Aynan shu sabab bilan Oston oktyabr oyida o‘tkazilgan BAAga qarshi uchrashuvda qatnasha olmagan edi.
2019 yildan beri terma jamoa o‘yinlarida ishtirok etayotgan yosh hujumchi 31 o‘yinda maydonga tushib 8 bor gol urgan.
