Superligada 25-tur yakunlandi. «Surxon» jamoasi bu tur safarda «Metallurg»ga qarshi bahs olib bordi va 0:1 hisobida imkoniyatni boy berdi. Bellashuvdan so‘ng jamoa bosh murabbiyi Fevzi Davletov matbuot anjumanida ishtirok etdi.

— Bugungi bahs og‘ir bo‘lishi haqida yigitlarni ogohlantirgan edik. Ularni tayyorlagan edik, ammo bizni eshitishmagan ko‘rinadi. Biz ikkinchi bo‘limda ham bahsni boshqardik, ammo gol kiritishni uddalay olmadik.

— 35-daqiqada Aslibek Jumayevning almashtirilishi sababi nima?

— Kichik jarohat bilan o‘yinga chiqqan edi. U raqib bilan to‘qnashuv jarayonida jarohatini jiddiylashtirib oldi. Qo‘shimchasiga, sariq kartochka ham oldi. Bu majburiy o‘zgarish bo‘ldi.

— «Metallurg» uchun bu hayot-mamot uchrashuvimidi?

— Albatta, biz g‘alaba qozonsak, boshqa jamoalarning o‘yiniga bog‘liq holatda ko‘tarilishimiz mumkin edi. Ular esa, jon saqlab qolish uchun oxirgi janglaridan birini o‘tkazdi. Albatta, bu omil maydonda sezildi.

— Mavsum boshida qo‘yilgan reja qay darajada bajarildi?

— O‘ylashimcha, stabil o‘tkazishni uddaladik. O‘tgan mavsumda jadvlani 6-o‘rin bilan yakunlagan edik. Hozircha, 7-o‘rinmiz. Ha, mavsum davomida bir nechta omadsiz o‘yinlarimiz bo‘ldi, biroq bu bizning xatomiz. Biz ulardan xulosa chiqargan xolda, kelasi mavsum ularni bartaraf etish uchun ishlaymiz.