Qozonning “Rubin” jamoasi yarim himoyachisi Umarali Rahmonaliyev Angliya Premyer ligasida o‘ynash istagi borligini aytdi. Bu haqda futbolchi “RIA Novosti”ga bergan intervyusida gapirgan.

Futbolchining aytishicha, Angliyada hujum, himoya va fikrlash juda tez.

“Bu aynan menga yoqadigan narsa. Qolaversa, u yerda mening sevimli jamoam o‘ynaydi, shuning uchun ham u yerda to‘p tepishni xohlayman. Rossiya Premyer ligasini ularning chempionatiga qiyoslash mumkin, ammo buning uchun ko‘proq hujumga o‘tib, ko‘proq nostandart o‘ynash kerak”, degan Rahmonaliyev.

Ma’lumot uchun, Umarali 2023 yili O‘zbekiston U-20 terma jamoasi bilan Osiyo chempioni bo‘lgan.

O‘sha yilning yanvaridan boshlab “Rubin” safida 27 ta o‘yinda maydonga tushib, ikkita golli uzatmani amalga oshirgan.