Superliga karvoni deyarli manziliga yetib qoldi. 30 noyabr kuni barcha o‘yinlar bir vaqtda boshlanadi. Turning markaziy o‘yini shubhasiz Namangandagi «Markaziy» stadionda bo‘lib o‘tadi. Unda muxlislar «Navbahor» hamda «Andijon» jamoalari ishtirokidagi vodiy derbisiga guvoh bo‘ladilar.

Bu ikki jamoalarning so‘nggi to‘qnashuvi yaqinda bo‘lib o‘tganini hamma yaxshi biladi. 5 oktyabr sanasida Farg‘onadagi O‘zbekiston Kubogi finali o‘zbek futbolidagi eng yaxshi final bo‘lib qoldi. Dramatik tarzda kechgan uchrashuvda «Andijon» raqibini qo‘shimcha vaqtlarda 3:2 hisobida mag‘lubiyatga uchratib, o‘z tarixida ilk bor Kubokni qo‘lga kiritganini barcha yaxshi biladi.

Bu yil hisobidan ushbu jamoalar uchinchi marta to‘qnash keladilar. Yodingizda bo‘lsa, birinchi davraning oxirgi turida «Bobur arena»da bo‘lib o‘tgan vodiy derbisida «Andijon» «Navbahor» darvozasiga javobsiz uchta gol urganini ham yaxshi bilasiz. Umumiy hisobda esa shu paytgacha mazkur jamoalar O‘zbekiston chempionatida 55 marotaba uchrashishgan. «Navbahor»ning hisobida 27, «Andijon»da esa 13 ta g‘alaba bor. 15 ta o‘yinda kuchlar teng kelgan. To‘plar nisbati 77-54 namanganliklar foydasiga.

«Andijon» «Navbahor»ga qarshi oxirgi ketma-ket uchta o‘yindan beri g‘alaba qozonib kelmoqda. Yuqorida ta’kidlaganimizdek, «Andijon» bu yil ikki marta «Navbahor»ni mag‘lub qildi. O‘tgan yilning 23-sentyabr sanasidagi bahsda ham «Burgutlar» o‘z uyida namanganliklarni 2:1 hisobida taslim qilgan.

Shuningdek, «Andijon» «Navbahor»ga qarshi Namanganda 7 marta durang o‘ynagan va 1 marta g‘alaba qozongan. O‘sha yagona g‘alabasi 3 yil oldin, 2021 yilgi mavsumda qo‘lga kiritganini muxlislar hali unutishgani yo‘q. «Andijon» Namanganda 0:1 hisobida raqibidan ustun kelgandi.

Jamoalarning navbatdagi 56-to‘qnashuviga ham doimgidek qiziqish katta. Bu safargi vodiy derbisi 30 noyabr kuni soat 15:00 da boshlanadi.