Bugun Bahrayn poytaxti Manama shahrida og‘ir atletika bo‘yicha jahon chempionati start oladi. Musobaqadan avval Xalqaro og‘ir atletika federasiyasining navbatdagi Kongressi bo‘lib o‘tdi. Mazkur tadbirda O‘zbekiston nomidan Sport vazirining o‘rinbosari, mamlakat og‘ir atletika federasiyasi raisining birinchi o‘rinbosari Shahrullo Mahmudov ishtirok etdi.
Kongress davomida tashkilotning yangi Olimpiya sikli uchun o‘z oldiga qo‘ygan rejalari ko‘rib chiqildi. Ko‘pchilikning diqqat-e’tiborini tortgani Los-Anjeles-2028 yozgi Olimpiya o‘yinlari uchun e’lon qilingan vazn toifalari bo‘ldi. Unga ko‘ra, AQSHda o‘tadigan Olimpiadada erkaklar va ayollar o‘rtasida 8 tadan, jami 16 ta vazn toifasi amal qilishi e’lon qilindi. Eslatib o‘tamiz, Parij-2024 yozgi Olimpiya o‘yinlarida og‘ir atletikachilar 5 tadan, jami 10 vazn toifasida medallar uchun kurash olib borgan edilar.
Bo‘lajak dunyo birinchiligida O‘zbekiston terma jamoasining 6 nafar a’zosi qatnashadi. Hamyurtlarimiz o‘z ishtiroklarini 10 dekabr kunidan boshlashadi.
