Bahrayn poytaxti Manama shahri mezbonlik qilgan kattalar o‘rtasidagi jahon chempionati o‘z nihoyasiga yetdi.

Dunyo birinchiligi yakunlariga ko‘ra, O‘zbekiston terma jamoasi a’zolari 3 ta oltin, 1 ta kumush hamda 2 ta bronza, jami 6 ta medalga ega chiqdi.

Erkaklar terma jamoamiz ushbu natija orqali sayyoraning 70 ga yaqin mamlakati ishtirok etgan dunyo birinchiligida umumjamoa hisobida kuchli uchlikdan joy oldi.

Manamadagi Jahon chempionatida -89 kg vazn toifasida Sarvarbek Zafarjonov dast ko‘tarishda bronza medalni, -81 kg vazn toifasida Muhammadqodir Toshtemirov dast ko‘tarishda bronza va ikkikurash yakunlariga ko‘ra kumush medalni, -109 kg vazn toifasida Sharofiddin Amriddinov dast ko‘tarishda oltin hamda xuddi shu vazn toifasida Ruslan Nuriddinov siltab ko‘tarishda va ikkikurashda oltin medalni qo‘lga kiritdi.

Ma’lumot uchun, Ruslan Nuriddinov o‘zi o‘rnatgan jahon rekordini yangilab uchinchi bor dunyoda tengsiz deb topildi.