SSKA va O‘zbekiston terma jamoasi yarim himoyachisi Abbosbek Fayzullayev Sport24 jurnalistlari Tigran Arutyunyan va Andrey Babich bilan suhbatda "Manchester Siti" hujumchisi Erling Xollandga o‘xshash ko‘zoynak sotib olganini va ularning Rossiyada mavjud emasligini aytib o‘tdi.

— Barcha jarayonlarni shikastlanishlarsiz qanday o‘tkazyapsan?
— Avvalo, Allohdan meni jarohatlardan saqlashini so‘rayman. Shu bilan birga, tiklanishga qattiq e’tibor beraman — massaj, sovuq suv, kriosaunalar. Bazadan hamma ketgandan keyin ketaman. Uyda ham ko‘p narsalar bor: limfodrenaj shtangalari, massaj pistoleti va ko‘k nurni filtrlaydigan ko‘zoynaklar — Xolandnikiga o‘xshash.

— Bu ko‘zoynaklar qanday yordam beradi?
— Ular uyqudan bir necha soat oldin taqiladi. Taqqan zahotingiz organizm melatonin ishlab chiqara boshlaydi, bu esa uyquni chuqurlashtiradi va organizmning yaxshiroq tiklanishiga yordam beradi. Shuningdek, ularda ko‘zlar dam oladi. Ammo bir shart bor — ularni taqqaningizdan keyingi dastlabki 45 daqiqa mobaynida gadjetlarga qarash mumkin emas. Bu juda muhim.