1997 yilgi mamlakat birinchiligida ikkinchi o‘rinni egallagan Bekobodning “Metallurg” futbol klubi Oliy liga yo‘llanmasini qo‘lga kiritdi va 27 mavsum davomida Elita safida uzluksiz ishtirok etdi. Shu yillar davomida Toshkent viloyatining eng shimolida joylashgan sanoatchilar shahri – Bekobod futbol ishqibozlariga unutilmas lahzalarni taqdim etdi. Bugungi qisqa hisobotimizda biz “Metallurg”ning Elitada bosib o‘tgan yo‘liga nazar tashlaymiz.

“Metallurg” 27 yil mobaynida kuchlilar safida 774 uchrashuv o‘tkazdi. Shulardan 252 tasida g‘alaba qozondi. 169 ta uchrashuvda raqiblar bilan ochkolarni baham ko‘rdi. 353 ta uchrashuvda esa imkoniyatni boy berdi. Raqiblar darvozasiga 920 ta to‘p kiritgan “Metallurg” o‘z darvozasidan 1152 ta gol o‘tkazib yubordi.

Jamoaning kuchlilar safidagi eng yirik g‘alabasi – 6:0 bo‘lib, bekobodliklar uch marta shunday hisobda raqiblarini dog‘da qoldirgan: 2001 yilda “Semurg‘” (Angren), 2006 yilda “Xorazm” va 2016 yilda “Mash’al” darvozasiga javobsiz oltita to‘p kiritgan. “Metallurg”ning eng yirik hisobdagi mag‘lubiyati 0:7 bo‘lib, 2003 yili “Navbahor”ga, 2004 yilda “Nasaf”ga yutqazgan.

“Metallurg”ni 27 yillik Elita futbolidagi ishtirokida 15 nafar bosh murabbiy boshqargan. Shuningdek, 4 nafar bosh murabbiy vazifasini boshqaruvchi mutaxassislar xizmatiga tayanilgan. Jamoa rulida eng ko‘p ishlagan murabbiy Rustam Mirsodiqov sanaladi. Rustam To‘xtamurodovich bekobodliklar rulida 11 yil bosh murabbiy sifatida mehnat qilgan. Ushbu maestrodan estafetani qabul qilib olgan Andrey Shipilov eng mo‘’tadil va ijobiy natijani ko‘rsatgan mutaxassis sifatida tarix sahifalariga o‘z ismi sharifini muhrlagan.

Quyida “Metallurg”ning 1998 – 2024 yillar mobaynida Oliy liga hamda Superligada qayd etgan natijalari bilan tanishing, tahlil qiling va xulosa chiqaring...