"Manchester Yunayted" bosh murabbiyi Ruben Amorim jamoasining "Brayton"ga (1:3) qarshi o‘yindagi omadsizligini tushuntirdi.

"Bu avvalgi o‘yinlarda ko‘rganimizga o‘xshaydi. Biz o‘tkazib yubormasligimiz kerak bo‘lgan gollarni o‘tkazib yubordik. Keyin o‘yinchilar asabiylashgani uchun to‘pga egalik qilishda qiynaldik. Bunday gol o‘tkazib yuborsangiz, biror narsani o‘zgartirish qiyin.

Biz vaziyatni tushunishimiz kerak, shu bilan birga, "Manchester Yunayted"ning tez-tez mag‘lubiyatga uchrashini qabul qilib bo‘lmaydi. Mashg‘ulotlarga vaqtimiz bo‘lmasa ham, biz o‘zimizni yaxshilashimiz kerak, bu aniq", dedi Amorim.