Futbol mutaxassisi Alisher Nikimbayev “Manchester Siti” klubiga o‘tayotgan o‘zbekistonlik himoyachi Abduqodir Husanovning joriy mavsumdagi Yevropa Chempionlar Ligasida ishtirok etishi bo‘yicha savolga javob berdi.

“Abduqodir «Manchester Siti”ning UEFA Chempionlar Ligasida umumiy guruh bosqichida qolgan ikkita bahsida o‘ynay olmaydi, chunki guruh bosqichi uchun arizalar 3 sentyabr kuni yopilgan.

Ammo Husanovda pley-offda ishtirok etish imkoniyati bor. Har bir klub guruh bosqichi yakunlangach, 6 fevralgacha ko‘pi bilan 3 nafar yangi o‘yinchini qaydnomaga kirita oladi.

Shuni qo‘shimcha qilamanki, yangi o‘yinchilar UEFA Chempionlar Ligasida (yoki umuman yevrokuboklarda) boshqa klublarda o‘ynagan-o‘ynamaganidan qat’i nazar tarkibga kiritilishi mumkin”, — deb yozadi Alisher Nikimbayev o‘z telegram kanalida.

Ma’lumot uchun, Abduqodir Husanov “shaharliklar” bilan 4,5 yilga mo‘ljallangan shartnoma imzolagan. Futbolchi o‘zi uchun 45-raqamni tanlagan. Ushbu transfer qiymati 40 million yevroni tashkil etadi.