Sloveniyalik murabbiy Srechko Katanes kecha, 22 yanvar knui O‘zbekiston milliy terma jamoasidagi faoliyatini yakunlagan edi. Murabbiy Sloveniyaning Sportklub saytiga sog‘ligi, faoliyati va O‘zbekiston MTJdan ketishi haqida fikrlarini bildirdi.

Saytning yozishicha, Katanes bilan birga uning yordamchilari Aleks Chex, Nixad Peykovich va Vlado Radmanovich ham jamoadan ketadi. Katanes o‘z intervyusida ikki oycha avval o‘zini juda yaxshi his qilayotgani, hozir ham yomon emas, barchasi joyidaligini ta’kidlagan.

“Ammo, baribir o‘zim istaganimdek emas. Shu bilan birga to‘shakka mixlanib qolganim yo‘q, hali ham sayrga, yurishga chiqaman. Yaratgan egam menga yordam bermoqda. So‘nggi vaqtlarda men Sloveniya va Xorvatiya orasida ko‘p qatnaydigan bo‘ldim”, – deydi Srechko.

Mutaxassis murabbiylik faoliyatiga to‘xtalib, iste’foga chiqish qarorini faqat o‘zi qabul qilganinni aytib o‘tdi.

"Hayotim davomida faqat boshqalar uchun harakat qilib, o‘zimni fido qilgandekman. Necha marta shartnomani bekor qilishni so‘raganimni bilasizmi? Ammo har safar bu fikrimdan qaytarishgan. Ammo bu – meni ishlashga undaganlarning aybi emas, faqatgina o‘zimning bosh murabbiy sifatidagi mas’uliyatim edi”, – deydi Katanes.

Srechko “futboldagi faoliyatingizga nuqta qo‘ydingizmi?” deb berilgan savolga hatto ertaga nima bo‘lishini bilmasligini aytib, faoliyatini yakunlaganiga sha’ma qilgan.

Ma’lumot uchun, 61 yoshli Srechko Katanes 2021 yil kuzidan beri O‘zbekiston milliy terma jamoasini boshqarib kelayotgandi.

Katanes qo‘l ostida O‘zbekiston terma jamoasi Jahon chempionatiga saralash bosqichida 6 turdan keyin 13 ochko bilan ikkinchi o‘rinda bormoqda. Guruhda 1 va 2-o‘rinlarni olgan jamoalar mundialga to‘g‘ridan to‘g‘ri yo‘llanmani qo‘lga kiritadi.