"Roma"ning sobiq futbolchisi va bosh murabbiyi 41 yoshli Daniele De Rossi katta futboldagi faoliyatini boshlagan "Ostiamar" futbol klubi egasiga aylandi.
Bu haqda De Rossining o‘zi "Instagram"dagi sahifasida ma’lum qildi.
"Men "Ostiamar" klubining egasi bo‘lganimni e’lon qilishdan mamnunman. Mening maqsadim - mustahkam, shaffof va innovasion klub qurish. Biz bu klubni odamlarni birlashtiradigan va oilalarni o‘z hududiga yaqinlashtiradigan joyga aylantirmoqchimiz.
Bugun yangi bob boshlanadi. Birgalikda biz faxrlanadigan tarixni yozishimiz mumkin" - deb yozadi De Rossi.
U 2000 yilgacha "Ostiamar" akademiyasida futbol o‘ynagan, shundan so‘ng u "Roma"ga ko‘chib o‘tgan va u yerda deyarli butun professional faoliyatini o‘tkazgan. "Ostiamar" hozirda Italiya futbolining to‘rtinchi divizioni bo‘lgan D Seriyasida ishtirok etadi.
