Ijtimoiy tarmoqlarda o‘zbekistonlik shaxmatchi Nodirbek Yakubboyev hindistonlik shaxmatchi bilan o‘yin oldidan qo‘lini siqib qo‘ymagani ko‘plab muhokamalarga sabab bo‘ldi.

Hodisa Tata Steel Challengers 2025 musobaqasining 4-turida ro‘y bergan. Odatga ko‘ra, shaxmatchilar qo‘l siqib o‘yinni boshlaydi. Ammo o‘zbekistonlik shaxmatchi Vaishaliga qo‘l uzatmadi.

Ko‘plab tanqidlarga sabab bo‘lgan holat bo‘yicha Yakubboyevning o‘zi tushuntirish berib, bu uning e’tiqodi bilan bog‘liqligini aytgan.

“Bugun (26 yanvar kuni) men bu haqda Irina Bulmagaga aytdim. U bunga rozi bo‘ldi. Ammo o‘yin zaliga kelganimda, hakamlar menga hech bo‘lmaganda “Namaste” qilishim kerakligini aytishdi. Divya va Vaishali bilan o‘yinlarda men ularga bu (e’tiqodim) haqda o‘yindan oldin ayta olmadim va noqulay holat yuzaga keldi.

Men Vaishali va uning akasi qatorida barcha hindistonlik shaxmatchilarni hurmat qilaman. Agar bu harakatim orqali uni noqulay vaziyatga qoldirgan bo‘lsam, buning uchun uzr so‘rashga tayyorman.

Men o‘zim to‘g‘ri deb bilgan ishni qilaman. Bu harakatim orqali barcha shunday qilishi kerak deb hisoblamayman, bu hammaning o‘ziga havola bo‘lgan tanlovidir”, dedi o‘zbekistonlik shaxmatchi.

Ma’lumot uchun, ushbu bahsda hindistonlik shaxmatchi g‘alaba qozongan. Kecha, 26 yanvar kuni Bulmagaga qarshi uchrashuvda g‘alaba qozongan Nodirbek Yakubboyev 4 ochko to‘plab turnir jadvalida 9-o‘rinda bormoqda.