“Inter Mayami” klubining afsonaviy argentinalik futbolchisi, sakkiz karra “Oltin to‘p” sohibi Lionel Messi hayotida ko‘rgan eng yaxshi futbolchi kim ekanini ma’lum qildi.

“Ronaldo — fenomen edi. Men ko‘rgan barcha futbolchilar orasida u eng yaxshisi bo‘lgan. Qaysi tomondan qaramang, u hayratlanarli o‘yinchi edi”, deya Messining so‘zlarini keltiradi Sport Bible nashri.

Ma’lumot uchun, Ronaldo o‘zining ajoyib tezligi, texnikasi va hujumlarni samarali yakunlashi bilan mashhur bo‘lgan. U professional faoliyatini “Kruzeyro” klubida boshlagan, keyinchalik “PSV”, “Barselona”, “Inter”, “Real” va “Milan” klublarida o‘ynagan.

Braziliyalik futbolchi ikki marta “Oltin to‘p” (1997, 2002) sohibi bo‘lgan. Shuningdek, u ikki karra jahon chempioni bo‘lgan (1994, 2002). 2002 yilda Ronaldo turnirning eng yaxshi to‘purari bo‘lib, Braziliyaning g‘alabasida hal qiluvchi rol o‘ynagan. Bundan tashqari, u Amerika Kubogi va Konfederasiyalar Kubogini qo‘lga kiritgan.

Uning futbolchilik faoliyati 2011 yilda yakunlangan.