Xabaringiz bor, xalqaro tajribaga ega bir qator mutaxassislardan iborat O‘zbekiston futbol hakamlari markazining yangi tuzilmasi tasdiqlanib, mazkur yo‘nalishni rivojlantirishga oid vazifalar belgilangan edi. O‘FA birinchi vitse-prezidenti Ravshan Irmatov hamda Texnik direktor Gi Kiala boshchiligida markaz oldida turgan keyingi rejalar yuzasidan onlayn yig‘ilish o‘tkazildi.
Yig‘ilishda hakamlar ta’limi sifatini oshirish, musobaqalar bilan ishlash va VAR texnologiyalaridan foydalanish masalalari muhokama qilindi. Shuningdek, hakamlarning jismoniy holatini nazorat qilishda ilg‘or texnologiyalardan foydalanish, shu jumladan, "POLAR" tizimi orqali jismoniy ko‘rsatkichlarni monitoring qilish bo‘yicha fikr almashildi.
12-24 fevral kunlari Antaliya shahrida Superliga hakamlari uchun o‘quv-mashg‘ulot yig‘ini tashkil etilmoqda. Ushbu yig‘inlar yangi mavsumga tayyorgarlikni kuchaytirishga, hakamlarni nazariy va amaliy jihatdan tayyorlashga, jismoniy tayyorgarlikni oshirishga xizmat qilishi qayd etildi.
