«Surxon» murabbiyi Stanislav Kudryashev «BIZNES Online» muxbiriga bergan intervyusida o‘zbekistonlik futbolchilarning rivojlanishi haqida fikr bildirdi hamda Abduqodir Husanovning «Manchester Siti»ga o‘tishiga baho berdi.  

Abduqodir Husanov haqida:  
«Husanov juda ham jismonan baquvvat yigit, kuchli. Uning asosiy ustuni — atletizmi va jismoniy kuchi. Uni yaxshi kelajak kutib turibdi, ammo u «Nyukasl»ga o‘tishi kerak edi, chunki bu klub uni bir yil davomida kuzatgan. U yerga o‘tishi lozim edi, ammo futbol — bu biznes, pul. Unga Fransiya va Angliya chempionatlari o‘rtasidagi o‘tish bosqichi kerak edi».

Abbosbek Fayzullayev haqida:
«SSKA safida Abbosbek Fayzullayev o‘ynamoqda, u mening qo‘l ostida ikki yil «Paxtakor» yoshlar jamoasida to‘p surgan. Juda iqtidorli bola, uni Xudo boshidan silab qo‘ygan, zo‘r futbol o‘ynaydi. Agar yaxshi klubga o‘tib, rivojlanishda davom etsa, uni yaxshi kelajak kutib turibdi. Men uni Ispaniya yoki Portugaliya kabi mamlakatlarda ko‘rishni xohlardim. Angliyada unga jismoniy jihatdan biroz qiyin bo‘ladi, tana tuzilishi ham unchalik mos emas».

Murabbiy haqida:
Stanislav Kudryashev futbolchi sifatida O‘zbekiston chempionatida «Navbahor», «Neftchi» va «Traktor» jamoalarida to‘p tepgan. Faoliyatini yakunlagandan so‘ng «Paxtakor» yoshlar akademiyasida murabbiy sifatida faoliyat olib borgan.