«Сурхон» мураббийи Станислав Кудряшев «БИЗНЕС Online» мухбирига берган интервьюсида ўзбекистонлик футболчиларнинг ривожланиши ҳақида фикр билдирди ҳамда Абдуқодир Ҳусановнинг «Манчестер Сити»га ўтишига баҳо берди.  

Абдуқодир Ҳусанов ҳақида:  
«Ҳусанов жуда ҳам жисмонан бақувват йигит, кучли. Унинг асосий устуни — атлетизми ва жисмоний кучи. Уни яхши келажак кутиб турибди, аммо у «Ньюкасл»га ўтиши керак эди, чунки бу клуб уни бир йил давомида кузатган. У ерга ўтиши лозим эди, аммо футбол — бу бизнес, пул. Унга Франция ва Англия чемпионатлари ўртасидаги ўтиш босқичи керак эди».

Аббосбек Файзуллаев ҳақида:
«ЦСКА сафида Аббосбек Файзуллаев ўйнамоқда, у менинг қўл остида икки йил «Пахтакор» ёшлар жамоасида тўп сурган. Жуда иқтидорли бола, уни Худо бошидан силаб қўйган, зўр футбол ўйнайди. Агар яхши клубга ўтиб, ривожланишда давом этса, уни яхши келажак кутиб турибди. Мен уни Испания ёки Португалия каби мамлакатларда кўришни хоҳлардим. Англияда унга жисмоний жиҳатдан бироз қийин бўлади, тана тузилиши ҳам унчалик мос эмас».

Мураббий ҳақида:
Станислав Кудряшев футболчи сифатида Ўзбекистон чемпионатида «Навбаҳор», «Нефтчи» ва «Трактор» жамоаларида тўп тепган. Фаолиятини якунлагандан сўнг «Пахтакор» ёшлар академиясида мураббий сифатида фаолият олиб борган.