"Liverpul" markaziy himoyachisi Virjil van Deyk jamoaning joriy mavsumdagi holati haqida o‘z fikrlari bilan o‘rtoqlashdi.

"Qizillar" barcha sovrinlar uchun kurashni davom ettirmoqda. Payshanba kuni Arne Slot shogirdlari yarim final javob o‘yinida "Tottenxem"ni 4:0 (umumiy hisobda 4:1) hisobida mag‘lub etib, Liga kubogi finaliga yo‘l olishdi.

Premyer-ligada ham mersisaydliklar ishonchli tarzda peshqadamlik qilmoqda, Chempionlar ligasida esa umumiy bosqich yakunida birinchi o‘rinni egallab, hech qanday qiyinchiliksiz 1/8 finalgacha yetib borishdi.

"Hozir fevral va biz hozirgi ahvolimiz haqida shikoyat qila olmaymiz, lekin biz buni oddiy jarayon deb qabul qilmasligimiz kerak. Buning ortida katta mehnat yotibdi", – dedi futbolchi.