"Ливерпуль" марказий ҳимоячиси Виржил ван Дейк жамоанинг жорий мавсумдаги ҳолати ҳақида ўз фикрлари билан ўртоқлашди.
"Қизиллар" барча совринлар учун курашни давом эттирмоқда. Пайшанба куни Арне Слот шогирдлари ярим финал жавоб ўйинида "Тоттенхэм"ни 4:0 (умумий ҳисобда 4:1) ҳисобида мағлуб этиб, Лига кубоги финалига йўл олишди.
Премьер-лигада ҳам мерсисайдликлар ишончли тарзда пешқадамлик қилмоқда, Чемпионлар лигасида эса умумий босқич якунида биринчи ўринни эгаллаб, ҳеч қандай қийинчиликсиз 1/8 финалгача етиб боришди.
"Ҳозир февраль ва биз ҳозирги аҳволимиз ҳақида шикоят қила олмаймиз, лекин биз буни оддий жараён деб қабул қилмаслигимиз керак. Бунинг ортида катта меҳнат ётибди", – деди футболчи.
