Germaniyaning Vayssenxaus shahrida shaxmat bo‘yicha o‘tayotgan «Freestyle Chess Grand Slam-2025» turnirining 1/4 finaliga yo‘l olgan shaxmatchilar nomi ma’lum bo‘ldi.

Mukofot jamg‘armasi 750 ming AQSH dollaridan iborat turnirning 1/4 finaliga 6,5 ochko bilan 1-o‘rinni egallagan Alireza Firuzja, qo‘shimcha ko‘rsatkichlarga ko‘ra, 6,5 ochko jamg‘arib, 2-o‘rinni band etgan Javohir Sindorov shuningdek, Fabiano Karuana (6), Magnus Karlsen (5,5), Xikaru Nakamura (5,5), Vinsent Keymer (4), Nodirbek Abdusattorov (3,5) va Gukesh Dommaraju (3,5) yo‘l oldi. Oxirgi o‘rinlarni egallagan Vladimir Fedoseev (2,5) va Levon Aronyan (1,5) endi 9-o‘rin uchun o‘zaro raqobatlashadigan bo‘ldi.

Turnir nizomiga binoan, peshqadamlar 1/4 finaldagi raqiblarini o‘zlari tanlash imkoniyatiga ega. Shunga ko‘ra, 1-o‘rinni egallagan Alireza Firuzja germaniyalik Vinsent Keymerni, 2-o‘rin sohibi Javohir Sindorov amerikalik Hikaru Nakamurani tanladi.

Nodirbek Abdusattorov 1/4 finalda norvegiyalik Magnus Karlsenga qarshi dona sursa, Chorak finalning so‘nggi juftligida amaldagi jahon chempioni Gukesh Dommaraju Fabiano Karuana bilan ro‘baro‘ keladigan bo‘ldi.

Aytish lozim, 17 fevralga qadar turnirning 1/4 finali o‘yinlari bo‘lib o‘tadi. Shundan so‘ng 1/2 final bahsi hamda o‘rinlar uchun musobaqalar ketma-ketligida tashkil etiladi.

Turnirda 1-o‘rinni egallagan shaxmatchi 200 ming, 2-o‘rin sohibi 140 ming, 3-o‘rin 100 ming, 4-o‘rin 60 ming, 5-o‘rin 50 ming, 6-o‘rin 40 ming, 7-o‘rin 30 ming, 8-o‘rin 20 ming, 9-o‘rin 12 ming 500, 10-o‘rin 7 ming 500 AQSH dollarini qo‘lga kiritadi.

Bugun, 9 fevral kuni 1/4 final o‘yinlari bo‘lib o‘tadi.