Germaniyaning Vayssenxaus shahrida "2025 Freestyle Chess Grand Slam" musobaqasida aylanma tizimi yakuniga yetib, bugundan pley-off bosqichi start oldi.

Pley-off bosqichi klassik shaxmatdan iborat bo‘ladi. Shaxmatchilar o‘zaro ikkitadan o‘yin o‘tkazishadi. Ikki o‘yindan keyin durang qayd etilsa, g‘olib taybrekda aniqlanadi.

Nodirbek Abdusattorov bugun qora donalarda Magnus Karlsenga qarshi o‘ynadi. Negadir, bahs boshidanoq hamyurtimizning o‘yini u qadar qovushmadi. Norvegiyalik grossmeyster esa Nodirbekning xatolaridan ustalik bilan foydalandi. 23-yurishga kelib Abdusattorov mag‘lubiyatini tan olishga qaror qildi. Vatandoshimiz ertaga oq donalarda o‘ynaydi.

Javohir Sindarov oq donalarda AQSHlik Xikaru Nakamuraga qarshi o‘ynadi. O‘yinning o‘rtalarigacha vaziyat teng bo‘lib turdi. Ammo hamyurtimizning 2-3 ta kichik xatolari tufayli AQSHlik grossmeyster yutuqli vaziyatni qo‘lga kiritdi. Ya’ni, Xikaru Farzinga chiqishi mumkin bo‘lgan bitta ortiqcha piyodaga bo‘lgandi. Ammo u qancha o‘ylasa ham yutuqqa olib boruvchi yo‘lni topa olmadi. Boz ustiga, shu paytgacha bexato o‘ynab kelayotgan Nakamura 49-yurishda qo‘pol xatoga yo‘l qo‘ydi. Javohir esa durangga olib boruvchi yagona bo‘lgan ketma-ket 2 ta yurishni topa oldi. Natijada Sindarov juda muhim durangga erishdi. Javohir ertaga Xikaruga qarshi qora donalarda o‘ynaydi.

Bugungi natijalar:

Alireza Firuzja - Vinsent Keymar - 0:1
Javohir Sindarov - Xikaru Nakamura - 0,5 : 0,5
Fabiano Karuana - Gukesh Dommaradju - 1:0
Magnus Karlsen - Nodirbek Abdusattorov - 1:0

Eslatib o‘tamiz, musobaqaning mukofot jamg‘armasi — 750.000 dollarga teng. G‘olib shaxmatchiga 200.000 dollar beriladi.