Германиянинг Вайссенхаус шаҳрида "2025 Freestyle Chess Grand Slam" мусобақасида айланма тизими якунига етиб, бугундан плей-офф босқичи старт олди.

Плей-офф босқичи классик шахматдан иборат бўлади. Шахматчилар ўзаро иккитадан ўйин ўтказишади. Икки ўйиндан кейин дуранг қайд этилса, ғолиб тайбрекда аниқланади.

Нодирбек Абдусатторов бугун қора доналарда Магнус Карлсенга қарши ўйнади. Негадир, баҳс бошиданоқ ҳамюртимизнинг ўйини у қадар қовушмади. Норвегиялик гроссмейстер эса Нодирбекнинг хатоларидан усталик билан фойдаланди. 23-юришга келиб Абдусатторов мағлубиятини тан олишга қарор қилди. Ватандошимиз эртага оқ доналарда ўйнайди.

Жавоҳир Синдаров оқ доналарда АҚШлик Хикару Накамурага қарши ўйнади. Ўйиннинг ўрталаригача вазият тенг бўлиб турди. Аммо ҳамюртимизнинг 2-3 та кичик хатолари туфайли АҚШлик гроссмейстер ютуқли вазиятни қўлга киритди. Яъни, Хикару Фарзинга чиқиши мумкин бўлган битта ортиқча пиёдага бўлганди. Аммо у қанча ўйласа ҳам ютуққа олиб борувчи йўлни топа олмади. Боз устига, шу пайтгача бехато ўйнаб келаётган Накамура 49-юришда қўпол хатога йўл қўйди. Жавоҳир эса дурангга олиб борувчи ягона бўлган кетма-кет 2 та юришни топа олди. Натижада Синдаров жуда муҳим дурангга эришди. Жавоҳир эртага Хикаруга қарши қора доналарда ўйнайди.

Бугунги натижалар:

Алиреза Фирузжа - Винсент Кеймар - 0:1
Жавоҳир Синдаров - Хикару Накамура - 0,5 : 0,5
Фабиано Каруана - Гукеш Доммараджу - 1:0
Магнус Карлсен - Нодирбек Абдусатторов - 1:0

Эслатиб ўтамиз, мусобақанинг мукофот жамғармаси — 750.000 долларга тенг. Ғолиб шахматчига 200.000 доллар берилади.