O‘zbekiston futbol hakamlar markazi mutaxassislari yangi mavsum oldidan reja asosida Superliga va Proliga jamoalari, jumladan «Mash’al», «Neftchi» va boshqa klublarga bosqichma-bosqich, zamonaviy hakamlik qoidalarini tushuntirishda davom etmoqda.

Mazkur uchrashuvlar davomida o‘tgan mavsumda yuzaga kelgan bahsli holatlar videoroliklar orqali tahlil qilinib, futbolchilarga zaruriy ma’lumotlar yetkazilmoqda. Shu bilan birga, murabbiylar va jamoa vakillari bilan muloqot o‘tkazilib, ularning savollariga mutaxassislar tomonidan batafsil javob berildi.

Shuningdek, «Surxon» jamoasining uy stadioniga VAR texnikasi o‘rnatilib, uning ishlash mexanizmi bo‘yicha hakamlar va klub vakillariga maxsuslar tomonidan tushuntirishlar berildi. Bu esa mavsum davomida bahsli vaziyatlarni yanada adolatli hal etishga xizmat qiladi.