Qozog‘iston terma jamoasi bosh murabbiyi vazifasini bajaruvchi Ali Aliyev Turkiyadagi o‘quv-mashg‘ulot yig‘ini doirasida bo‘lib o‘tgan «Lokomotiv» (O‘zbekiston) bilan nazorat uchrashuvi (1:1) haqida fikr bildirdi.

— O‘yin juda foydali bo‘ldi. Biz bu uchrashuvni futbolchilarni yig‘ish uchun tashkil qildik — ular klublarida har xil rollarni bajaradi, lekin terma jamoada yagona falsafa va model bo‘lishi kerak. Shuning uchun bu o‘yin biz uchun muhim edi, chunki futbolchilar nazariya va amaliy mashg‘ulotlarda berilgan ma’lumotni qanday o‘zlashtirishini ko‘rish kerak edi. Texnik va taktik jihatdan qaraganda, men qoniqish hosil qildim. Biz urgan gol, qo‘lga kiritilgan penalti va «Lokomotiv»ga nisbatan ko‘rsatilgan bosim ijobiy taassurot qoldirdi. Qaysi futbolchilar yuqori darajada o‘ynashga tayyorligini taxminan bilib oldik.  

Jismoniy tayyorgarlik borasida esa klublarga minnatdorchilik bildirib qolaman, chunki ular futbolchilarni bizga ishonib topshirishdi. Biz yuklamani bir xil taqsimlashga harakat qildik. Umuman olganda, futbolchilar yuklamani qabul qilishdi va falsafani tushunishdi. Biz natijadan tashqari hammasi bilan qoniqdik. Faqat natija biroz xafsalani pir qildi: «Lokomotiv» katta tajovuzkorlik namoyon etmadi, faqat standart vaziyatlardan tashqari. Ularda xavfli vaziyatlar ham bo‘lmadi — yigitlar himoya va hujumda yaxshi o‘ynashdi. Bu o‘yin futbolchilar uchun juda foydali bo‘ldi. Hatto kiyinish xonasida ham ular natijadan qoniqmaganliklari sezildi, chunki maydonda ma’lum bir ustunlik ko‘rinib turdi, — dedi Aliyev.