18 fevral sanasida «Andijon» Antaliya yig‘ini doirasida navbatdagi o‘rtoqlik uchrashuvini o‘tkazadi. Bu safargi raqib — Polshaning “Vishista Krakov” klubi.

Yodingizda bo‘lsa, jamoa Turkiyadagi ilk o‘rtoqlik uchrashuvini Polshaning boshqa bir jamoasi – “LKS Lodz”ga qarshi o‘tkazib, 0:0 hisobida durang o‘ynagandi. Bu gal Polshaliklarning yana bir jamoasi «Andijon» uchun sparring-raqib vazifasini bajaradi.

Odatimizga ko‘ra, navbatdagi raqib to‘g‘risida sizlarga ma’lumotlarni taqdim etamiz.

“Vishista Krakov” 1942 yilning 1 yanvar sanasida tashkil etilgan. Polshaning Krakov shahrida futbol klublari bir nechtani tashkil qiladi va ularning orasida “Vishista Krakov” ham bor. Ushbu klub o‘z ishtirokini ayni paytda Polshaning ikkinchi divizionida davom ettirmoqda.

Jamoa hozirda ikkinchi divizionda 18 ta klub orasida 19 ta uchrashuvning 14 g‘alaba, 3 durang va 2 mag‘lubiyat qayd etib (to‘plar nisbati 45\10) 45 ochko bilan 2-o‘rinni band etib turibdi.

Klub arenasining nomi “Vishista Krakov” stadioni deb ataladi va 1,500 ming muxlisga mo‘ljallangan. Stadion 2021 yilda qurilgan.

Jamoaning bosh murabbiyi Slavomir Peshko hisoblanadi. 1985 yilning 19 fevral sanasida tavallud topgan mutaxassis 2023 yildan beri klubda ishlab kelyapti. Dastlab skaut, keyin vaqtincha murabbiy sifatida ishini davom ettirdi. 2023 yilning 1 dekabrdan esa u bosh murabbiy lavozimida mehnat qila boshladi.

Klub tarkibida, ispaniyalik (to‘rt nafar), shvesiyalik, chexiyalik, portugaliyalik legioyerlar to‘p surmoqda.

“Vishista Krakov” Antaliya yig‘inida 4 ta o‘rtoqlik uchrashuvi o‘tkazishi rejalashtirilgan va jamoamizga qarshi o‘yin ularning so‘nggi bellashuviga aylanadi.

10 fevral “Vishistka Krakov” – “KSM Resita” (Ruminiya) – 2:4

11 fevral. “Vishista Krakov» – “Kalvariya Zebjidovska” (Polsha) – 8:1

13 fevral. “Vishista Krakov” – “Kaspiy Aktau” (Qozog‘iston) – 3:1

Eslatib o‘tamiz, «Andijon» – “Vishista Krakov” bellashuvi 18 fevral kuni soat Toshkent vaqti bilan 13:30 da (Antaliya vaqtiga 11:30) boshlanadi.