"Komo" yarim himoyachisi Nikolas Pasga Yevropa grandlari qiziqish bildirmoqda.

Madridning "Real" klubi argentinalik futbolchini o‘tgan yilning yozida "Komo"ga sotib yuborgan va birinchi navbatda sotib olish huquqini o‘zida saqlab qolgandi. 20 yoshli futbolchi Italiyada shu qadar yorqin o‘yin ko‘rsatmoqdaki, "qirollik klubi" allaqachon o‘z tarbiyalanuvchisini qaytarish haqida o‘ylamoqda. Ayni paytda, insayder Fabrisio Romanoning yozishicha, Pasning transferi ustida Milanning "Inter" klubi ish olib bormoqda. "Neradzurrilar" futbolchining vakillari bilan muzokaralar olib bormoqda. Milan grandi vise-prezidenti Xavyer Dzanetti porlayotgan yulduzning otasi bilan yaxshi munosabatda.

Transfermarkt ekspertlari Nikolas Pasning narxini 20 mln yevroga baholamoqda. "Real" hujumkor yarim himoyachi boshqa klubga sotilsa, uning transfer summasining 50 foizini oladi.